Miingon ang kampo ni Vice President Sara Duterte nga bisan pa sa testimonya ni Ramil Madriaga sa impeachment hearing niadtong Martes, wala sila nabalaka sa epekto niini sa kinatibuk-ang resulta sa hearing.
Sa usa ka interbyu, gibutyag ni Atty. Salvador Panelo nga ang nangaging mga pahayag ni Madriaga pulos bakak ug nga kung ang impeachment madala na sa hustong forum sama sa Senado, ang iyang mga pahayag mapamatud-an nga peke ug dili tinuod.
Dugang ni Panelo nga ang bugtong gikabalak-an sa habig sa Bise Presidente mao nga ang komite basin motuo niining mga bakak labi na kay ang mga miyembro sa House Justice Committee pulos mga kaatbang sa politika sa Bise Presidente.
Samtang, sa usa ka mando gikan sa Manila Regional Trial Court niadtong Miyerkules, gitugotan sa korte si Madriaga nga motambong sa umaabot nga hearing sa House of Representatives aron hisgutan ang impeachment ni VP Sara.
Ang mando nag-ingon nga bisan gitugotan si Madriaga nga motambong sa hearing, kinahanglan siyang adunay hustong jail escort ug tugutan lang gikan sa alas 8:00 sa buntag hangtod alas 5:00 sa hapon.
