Subling gihingusgan sa kampo ni kanhi Negros Oriental 3rd District Representative Arnolfo Teves Jr nga dili pwedeng ma-extradite ang kanhing magbabalaud samtang natanggong ang political asylum request niini sa Timor Leste.
Matud ni Atty. Ferdinand Topacio, legal counsel ni Teves, iapela nila ang extradition order nga gi-isyu batok sa iyang kliyente sa Timor Leste Court of Appeals.
Sa iyang pamahayag, ang desisyon nga gipakanaug kang Teves pwede pang iapela ug kini ilang himuon.
Gihimo ni Topacio ang pahayag human nga kumpirmahon sa DOJ nga gipaburan sa Timor Leste ang extradition request nga gipasaka sa gobyerno sa Pilipinas batuk kang Teves.
Gipaklaro pa ni Topacio, nakalatid sa Article 300 sa Code of Civil Procedure sa Timor-Leste, aduna silay 30 ka adlaw magsumite ug apela sukad nga maisyu ang notice.
Samtang, gibutyag sa DOJ nga ang motion for reconsideration nga gipasang-at sa kampo ni Teves alang sa political asylum request niini ang gibasura na.
Kini ang gikumpirma ni DOJ Undersecretary Raul Vasquez sa usa ka interview.
Nagpasalamat usab ang DOJ sa Timor Leste tungod sa nahimong desisyon sa Timor Leste Court of appeal.
Galaum kini nga ibasura usab sa korte sa maong nasud ang apela ni Teves alang sa iyang extradition order.
