GENSAN- Gibutyag ni Atty. Rey Carojano nga ang kabatan-onan ilabi na ang mga non-affiliated o walay giapilang organisadong grupo maoy posible nga magdala sa tinuod nga ‘tipping point’ sa mga protesta batok sa kurapsyon sa gobyerno.
Matod pa ni Atty. Cartojano nga daghan sa iyang nakita nga miapil sa bag-ohay nga mga lihok protesta ang walay klarong grupo o agenda, apan gipalihok sa kasamtangang kahimtang, kasuko, ug kaguol sa sistema.
Gipasabot niya nga ang organisadong mga grupo sa protesta gamay ra og porsyento, ug kon gusto nila nga mukusog ang lihok, kinahanglan makuha nila ang simpatiya ug suporta sa mas daghang kabatan-onan.
Gihimong ehemplo ang mga nahitabo sa Nepal ug Indonesia, diin ang paglihok sa mga GenZ walay pormal nga grupo nga maoy nagresulta sa dakong gubot.
Gidasig ni Atty. Cartojano ang tanang sektor nga palig-onon ang plataporma sa protesta, ug gamiton kini aron pakigbisugan ang tinuod nga reporma sa gobyerno, dili lang isog nga pagsupak kundi tin-aw nga panawagan para sa kausaban.
