Nagpabiling aktibo sa kalibutan sa musika ang beteranong singer-songwriter nga si Jose Mari Chan ug giingong wala pa siya’y plano nga moretiro bisan pa sa iyang edad nga 81 anyos.
Atol sa pakighinabi sa media alang sa iyang umaabot nga konsiyerto nga “Afterglow: Seasons of the Heart” karong Hulyo 11 sa Philippine International Convention Center, gipaambit ni Chan ang pipila sa labing makahinumduman niyang mga kasinatian sa iyang taas nga karera sa musika.
Lakip sa iyang gihisgutan ang iyang pag-apil sa usa ka international song competition sa Japan niadtong dekada 70 pinaagi sa awit nga ‘Can We Just Stop and Talk for A While.’ Matud niya, ang maong kanta gipili mismo sa mga Japanese ug nahatagan siya og higayon nga mokanta niini sa internasyonal nga kompetisyon.
Gipaambit usab ni Chan nga dugay na siyang wala makadawat og dakong royalty payments gikan sa iyang mga gikomposong kanta tungod kay dili na sama kaniadto ang paggamit sa mga CD ug records. Matud pa niya, bisan adunay gamayng kita gikan sa iyang mga Christmas songs, dili na kini sama sa una ug igo na lamang sa gagmayng gastohan.
Bisan pa niini, wala gihapon siya naghunahuna sa paghunong sa pagkanta. Matud ni Chan, padayon siyang mag-perform basta adunay kusog ug adunay mga tawo nga gustong maminaw sa iyang mga kanta sa personal.
Dugang pa niya, naa na sa iyang dugo ang pagkanta ug paghatag og kalipay sa mga tawo pinaagi sa iyang musika.
