Gidugang sa United Nations ang Israel sa “blacklist” sa mga nasud nga nagahimo ug pagpang-abuso ug pagpatay sa mga kabatan-unan sama sa gyera sa Gaza.
Sumala kang Israeli Ambassador to the UN Gilad Erdan, nadawat na niini ang official notification kabahin sa nahimong desisyon ni UN Secretary-General Antonio Guterres.
Kauban sa Israel sa maong listahan mao ang Russia, the Democratic Republic of the Congo, Somalia, Syria ug Haiti.
Mahimo nga maggamit sa uban nga mga nasyon ang maong blacklist isip signal nga limitahan ukon dumilian na ang pagbaligya sa armas sa mga nasud nga nakahimo sa maong pagpangabuso ug pagpatay sa mga kabatan-unan.
Gikan sa pagsugod sa gyera sa Gaza kaniadtong Oktubre 2023, sobra na sa 36,700 Palestinians ang napatay tungod sa pagpangatake sa Israel isip balos sa Hamas militants, ug lakip niini nga numero ang 15,571 ka mga bata subay sa datos sa Gaza government media office.
