Gikompirma ni Senate President Chiz Escudero nga sugdan na ang husay sa Senado sa impeachment complaint nga gipasaka batok kang Bise Presidente Sara Duterte human sa State of the Nation Address (SONA) ni Presidente Ferdinand “Bongbong” Marcos Jr. sa Hulyo.
Sa press conference karong Lunes, Pebrero 10, gipangutana si Escudero kung kanus-a ang “actual” impeachment trial batok kang Duterte.
Kahinumduman niadtong Miyerkules, Pebrero 5, dihang gisang-at sa Senado ang impeachment complaint batok kang Duterte human kini aprobahan sa House of Representatives pinaagi sa kapin 215 ka pirma sa mga magbabalaod.
Sa impeachment trial sa Senado, gikinahanglan ang two-thirds vote, o 16 sa 24 ka senador, aron hingpit nga mapalagpot si Duterte sa katungdanan.
