GENERAL SANTOS CITY – Gibutyag ni Atty. Edmar Yumang, Vice Mayor-Elect, nga daghang “schools of thought” ang naglibot sa pangutana kung pwede ba o dili ipadayon ang impeachment complaint batok kang VP Sara Duterte sa 20th Congress.
Sumala ni Atty. Yumang, ang uban motuo nga dili na kini pwede ilahos, tungod human na ang 19th Congress pag-abot sa Hunyo 30.
Sama sa tanang legislative ug non-legislative functions sa Kongreso, mouban kini sa pagtakop sa termino, busa dili na kini mahimo nga matabok pa.
Apan sa laing bahin, aduna usab mga legal nga panan-aw nga pwede kini ipadayon, ilabi na kay ang impeachment process giila nga non-legislative function sa Senado, sama sa mga kaso sa House of Representatives Electoral Tribunal (HRET) ug sa Senate Electoral Tribunal (SET).
Sa maong mga kaso, kung wala kini mahuman sa sulod sa usa ka termino, pwede kini magpadayon sa sunod nga Kongreso.
Bisan pa man, giangkon ni Atty. Yumang nga speculative pa gihapon ang tanang posibilidad, ilabi na kay wala pay klarong mayoriya si VP Sara sa Senado nga posible makatabang sa pagpugong sa impeachment complaint.
Sa pagkakaron, ang isyu posibleng muabot sa Supreme Court, diin ang pinal nga interpretasyon sa balaod kabahin sa maong proseso pagahukman.
