GENERAL SANTOS CITY – Giangkon sa liderato sa Police Regional Office 12 kon PRO-12 nga hangtod imbestigasyon ug pagpagawas ug mga advisory pa lamang ang ilang kayang himuon may kalabutan sa hisgutanan sa nagkuyanap nga mga investment scam sa dakbayan ug sa mga kasikbit lugar.
Kini ang gibutyag ni P/B/Gen. Eliseo Tam Rasco, Regional Director, PRO 12, human ang natigayong interagency coordinating conference kagahapong adlawa sa PRO-12 Headquarters sa tumong nga imbestigahan ug ihan-ay ang mga himuong lakang aron mahunong na ang daw sa uhong nga pagkatag sa mga nagkalain-laing investment scam nga nagtanyag sa katawhan ug 30%-400% nga interes sa gi-invest nga salapi.
Gikabutyag nga nasuta nga miabot na bisan sa Luzon ug Visayas ang naasoy’ng mga pagpangilad.
Mitambong sa panagtigom ang taga-City Legal Office, General Santos City Chamber of Commerce and Industry, Bankers Association, DTI, NBI ug Napolcom, kung asa nahimo pang closed-door ang ilang panaghisgot.
Human sa panagpulong, gipahimangnuan sa Napolcom ang kapulisan nga dili na muapil sa susamang mga investment scam tungod gipatas-an na sa gobyerno ang ilang sweldo.
Kini human gikataho nga daghan sa kapulisan sa siyudad ang nabiktima sa Police Paluwagan Movement o PPM.
Nagpahimangno usab ang Chamber of Commerce and Industry tungod gumikan sa naasoy’ng mga investment scam, maapektuhan ang ekonomiya sa siyudad ug daghang tawo ang mawad-an ug salapi ug mga katigayunan aron i-invest sa naasoy’ng mga investment scam.
Kahinumduman nga miaging mga semana, nagpagawas ug kamanduan ang DILG kung asa gimanduan ang tanang lokal nga panggamhanan, PNP ug NBI nga ipatuman na ang cease and desist order kon CDO nga gipagawas sa Securities and Exchange Commission kon SEC batok sa KAPA.
