GENERAL SANTOS CITY – Ginasaulog ning adlawa, Hunyo 15, ang ika-49 nga charter anniversary ning siyudad.
Base sa gipagawas nga memorandum sa lokal nga panggamhanan ning siyudad partikular ang Local Executive Order No. 38, Series of 2017, gideklarang special non-working holiday karong adlawa, isip pagsaulog sa 49th City Charter Day.
Kahinumduman nga daghan ang naglibog kon holiday ning adlawa o dili, human nga pakyas nga madeklarang holiday gumikan wala napirmahan ni Pangulong Rodrigo Duterte ang hangyo sa lokal nga panggamhanan nga ibalhin ang petsa sa charter anniversary ning siyudad gikan sa Setyembre 5 ngadto sa Hunyo 15, may mga aktibidad gihapon nga ipahigayon ning adlawa nga pangunahan sa mga opisyal ning dakbayan.
Kahibaluan nga alas-5:00 pa lang sa sayo sa buntag, nagsugod na ang ang gipahigayong civic military parade nga nanukad sa Queen Tuna Park.
Muagi kini sa P. Acharon Boulevard, dayon sa Pioneer Avenue, hangtod sa atubangan sa istatwa ni General Paulino Santos sa Plaza Heneral Santos.
Kahibaluan nga Hunyo 15, 1968 dihang gipirmahan ni kanhing Pangulong Ferdinand Marcos ang deklarasyon nga usa na ka siyudad ang Heneral Santos.
Apan Setyembre 5 sa maong tuig gipahigayon ang inagurasyon, hinungdan nga pipila ka tuig usab nga sa maong petsa gisaulog kaniadto ang charter anniversary sa siyudad, apan karon natul-id na ug gihimong Hunyo 5.
