Niabot na sa walo ang ihap sa nangamatay sa Mindanao tungod sa padayong grabe nga panahon nga nakaingon usab sa lapad nga pagbaha sa rehiyon.
Matod ni Office of Civil Defense (OCD) Administrator Usec. Ariel Nepomuceno, pagkalumos ang hinungdan sa kamatayon sa walo ka mga indibidwal.
Sa datus sa ahensya, kapin sa 70,875 ka pamilya o katumbas sa 345,000 ka indibidwal ang kasamtangang apektado sa baha gikan sa 192 ka barangay sa rehiyon IX, X, XI, XII, ug bisan sa Bangsomoro Autonomous Region (BAR) diin gikan sa maong ihap, 8,000 ka pamilya ang kasamtangang anaa sa 11 ka mga evacuation centers niining mga rehiyon sa Pilipinas.
Ang tibuok probinsya sa Maguindanao Del Sur gideklarar usab ubos sa State of Calamity samtang duha usab ka siyudad ug lungsod gikan sa Rehiyon IX ug BARMM ang anaa usab niining lebel.
Samtang, ang mga ahensya sa gobyerno nagpadayon sa pag-apod-apod sa mga relief goods ug mga mainit nga pagkaon sa mga apektadong residente samtang ang OCD nagpadayon sa pag-monitor sa umaabot nga kahimtang sa panahon sa rehiyon.
