Misaka sa bag-ong rekord nga 107,677 ang gidaghanon sa mga Hapon nga edad 100 anyos pataas karong tuiga, sumala sa Ministry of Health, Labour and Welfare.
Kini na ang ika-56 nga sunod-sunod nga tuig nga misaka ang gidaghanon sa mga centenarian sa Japan, diin kapin 88 percent kanila mga kababayen-an.
Gipasigarbo sa Japanese government ang taas nga kinabuhi sa ilang mga lungsoranon nga giingong nalambigit sa maayong serbisyo medikal, makapahimsog nga pagkaon ug aktibong estilo sa kinabuhi.
Apan nagpadayon usab ang problema sa demograpiya sa Japan tungod sa paspas nga pagkatigulang sa populasyon, samtang mikunhod ang ‘birth rate’ ngadto sa labing ubos nga lebel.
Sa pagkakaron, kapin tulo sa matag napulo ka residente sa Japan ang edad 65 anyos pataas, ug gibanabana nga mosaka pa kini ngadto sa 40 percent pag-abot sa 2070.
Nagdala kini og dakong hagit sa ekonomiya tungod sa kakulang sa mga trabahante nga maoy nagtabang sa pagpondo sa pension, healthcare ug ubang serbisyong sosyal alang sa mga tigulang.
Bisan pa sa mga insentibo ug pinansyal nga tabang nga gipatuman sa gobyerno alang sa mga pamilya, nagpabiling hagit sa ekonomiya sa Japan ang padayon nga pagkunhod sa populasyon.
