Nagmando ang International Criminal Court (ICC) Pre-Trial Chamber I sa prosekusyon nga kompletohon ang ebidensya sa kasong crimes against humanity batok kang kanhi Presidente Rodrigo Duterte sa o sa dili pa ang Hulyo 1, 2025.
Sumala sa 20-panid nga dokumento nga gipagawas niadtong Abril 17, kinahanglang ilakip sa prosekusyon ang tanang ebidensiya nga gamiton sa confirmation hearing, lakip na ang mga pamahayag sa saksi, ilang mga hubad, ebidensya nga mahimong pabor sa akusado, ug uban pang mga dokumento subay sa Rule 77 sa ICC Rules.
Gipasiugda sa ICC nga ang bisan unsang ebidensya nga gisumite pagkahuman sa takdang petsa dili dawaton.
Kahinumduman nga nag-atubang si Duterte og kasong crimes against humanity tungod sa giingong pagpamatay nga nahitabo sa Pilipinas gikan niadtong Nobyembre 1, 2011 hangtud Marso 16, 2019.
Si Duterte gidakop sa Manila niadtong Marso 11 human sa pag-abot gikan sa Hong Kong, ug kasamtangang gitanggong sa The Hague.
Tulo ka adlaw human sa iyang pagdakop, mitunga siya sa unang pagdungog sa ICC alang sa pagkumpirma sa mga kaso.
