Giangkon sa Houthis sa Yemen ang pag-atake sa duha ka oil tanker sa Saudi Arabia sa Red Sea.
Giasoy sa Houthi rebels sa Yemen nga sila ang responsable sa pag-atake sa duha ka oil tanker sa Saudi Arabia nga naglawig sa Red Sea.
Gipangalanan sa Houthis ang mga barko nga ilang giatake nga Encelia ug Layla.
Bisan pa man nga giangkon sa rebeldeng grupo nga sila ang anaa sa luyo sa maong pag-atake, wala pa kini makumpirma sa mga awtoridad.
Matud ni Houthi military spokesperson Yahya Saree, gipuntirya nila ang mga barko pinaagi sa mga missile ug drone tungod sa ilang alegasyon nga nakalapas kini sa naval blockade nga ilang gipahamtang batok sa mga barko sa Saudi Arabia.
Matud pa niya, ipadayon sa Houthis ang ilang naval operations ug ang pagpatuman sa gitawag nilang “siege for a siege equation.”
Una niini, gikumpirma sa Saudi Press Agency kagahapon sa buntag, Huwebes, Hulyo 23, nga naigo ang barkong Encelia samtang naglawig sa Red Sea, hinungdan sa pagkasunog sa unahang bahin sa barko.
Sa pagkakaron, wala pa’y kumpirmasyon kung unsa kadako ang kadaot sa ikaduhang barko. Apan gipahibalo sa mga awtoridad nga luwas ang tanang tripulante sa duha ka barko ug walay natala nga nasamdan.
Samtang, nagpahinabo kini og dakong kabalaka sa seguridad sa mga commercial vessel nga naglawig sa Red Sea.
Daghang oil tanker ang napugos sa pag-usab sa ilang ruta o paglikay sa Bab el-Mandeb Strait aron malikayan ang hulga. Gipaabot usab ang posibleng pagsaka sa presyo sa lana sa tibuok kalibotan tungod sa nagkagrabeng tensyon sa maong lugar.
