Gipakusgan sa Provincial Health Office sa Sarangani ang active case finding alang sa HIV aron mas sayo nga matino ug matambalan ang mga tao nga posibleng natakdan sa maong virus.
Sumala kang Dr. Arvin Alejandro, Provincial Health Officer sa Sarangani Provincial Hospital, gipalapad sa probinsya ang ilang mga pamaagi sa screening ug paghatag og hustong impormasyon aron mas daghang residente ang maengganyo nga magpa-HIV test.
Gidasig usab ang publiko, ilabina ang mga naa sa mga grupo nga adunay mas taas nga risgo sa HIV infection, nga boluntaryong magpakonsulta ug magpa-test aron mahibal-an ang ilang HIV status.
Adunay HIV treatment hub sa Sarangani Provincial Hospital sa Alabel, samtang ang maong pasilidad gilakip usab sa mga accredited HIV-AIDS treatment providers sa Region 12
Samtang nikabat na sa 235 ihap sa bag-ong HIV diagnoses nga natala sa SOCCSKSARGEN sa ikaduhang quarter sa 2026, nga nagrepresenta sa 8 percent sa tanang bag-ong kaso sa nasud atol sa maong panahon.
Sa unang quarter pa lamang sa 2026, anaa na sa 277 ang HIV cases nga natala sa Region 12, base sa datos sa Department of Health.
