Mas tutokan sa General Santos City Police Office o GSCPO ang pagpatuman sa curfew sa mga menor de edad ug mga lagda batok sa pagbaligya ug pag-inom og ilimnong makahubog sa mga pampublikong lugar.
Sumala kang PCol. Ariel Acala, City Director sa GSCPO, gimandoan niya ang mga station commander nga regular nga susihon ang pagsunod sa curfew sa mga menor de edad matag gabii, ingon man ang liquor ban sa mga pampublikong lugar.
Gimanduan usab ang mga kapulisan nga manita sa mga tawo nga mag-inom sa gawas sa gitugot nga oras ug mosunod sa tukmang proseso kung adunay makit-ang paglapas sa mga ordinansa.
Gipunting ni Acala nga ang direktiba kabahin sa paglikay sa mga insidente sa kagubot sa siyudad, ilabi na human sa mga milabayng insidente sama sa rumble nga mikaylap sa social media.
Pinaagi niini, gilauman sa GSCPO nga mapadayon ang kalinaw ug kahapsay sa mga komunidad ilabi na panahon sa gabii.
