Nagpagawas og subling pahimangno si Glan Mayor Victor James Yap Sr. ngadto sa iyang mga konstituwente ug sa publiko bahin sa responsableng paggamit sa social media, ilabina sa pagdumala sa mga hulga o online threats.
Gihangyo sa alkalde ang publiko nga dili i-share, i-repost o ipakaylap ang bisan unsang hulga nga makita sa social media, tungod kay mahimo lamang kining makadugang sa kahadlok, kalibog ug kasamok sa komunidad.
Pahimangno usab ni Yap nga dili angay isipon nga komedya lamang ang pag-post o pagpadala og mga hulga online, tungod kay mahimo gihapon kining adunay katumbas nga legal nga panubag.
Giawhag sa alkalde ang publiko nga ireport dayon sa kapolisan o sa mga lokal nga opisyal ang bisan unsang kaduda-dudang mensahe o post, imbes nga ipakatap pa kini sa social media.
Sumala kaniya, mas maayong itugyan sa mga otoridad ang maong mga impormasyon aron maaksyonan ug maimbestigahan sa hustong paagi ug mapadayon ang kalinaw ug seguridad sa komunidad.
