GENERAL SANTOS CITY – Wala makalikay sa epekto sa 2019 coronavirus disease(COVID) ang overseas Filipino Worker(OFW) dihang nag-exit sa China og miadto sa Thailand.
Matud ni Bombo international correspondent Jong Segismundo, usa ka musician/gitarista, dihang nawad-an og trabaho sa Tianjin, China human nga nanirado ang gitrabahuan tungod sa pagpatuman sa lockdown, nakadesisyon nga manimpalad sa Phuket Thailand tungod adunay nagtanyag kaniya og trabaho.
Apan igo ra nag-usa ka bulan niadtong Marso 18 sa lugar nagmando si Thailand Prime minister Prayut Chan-o-cha nga ihunong ang tanang mga kalingawan aron malikayan ang pagkatag sa covid 19 hinungdan nga apektado usab sa sitwasyon.
Nagsugod na ang pagpatuman sa curfew ning adlawa nga gikan alas 7:00 sa gabie hangtod alas 7:00 sa buntag.
Tungod niini ‘totally closed’ ang mall, bars og uban pang establisiemento aron makontrola ang virus apan dili sa mga restaurants nga may delivery services.
Sa pamahayag ni Segismundo, mas doble pa ang himuon niining pag-amping karong anaa sa Phuket tungod mas daghan matud pa ang mga langyaw nga nakit-a niini sa Thailand kumpara sa China.
Gani, sa eroplano nga gisakyan niini padulong sa Thailand, daghan kini og nakasabay nga mga pasaherong Chinese national.
