Target sa Office of the Vice President ang kinatibuk-ang 1,139,244 ka benepisyaryo sa ilang flagship programs ubos sa gisugyot nga P2.037-bilyon nga budget sa tuig 2025.
Sa nasangpit nga proposed budget, 87.98 percent niini ang maadto sa ‘OVP programs and projects’ samtang 12.02 percent ang maadto sa personnel services, equipment, ug vehicles.
Matod sa OVP, ilahang tumong nga mapalapdan pa ang paghatod sa mga serbisyo gikan sa nagkadaiyang programa sa Opisina ngadto sa mas daghang Pilipino sa nasud.
Ang budget hearing sa OVP orihinal nga gikatakda karong Huwebes, Agosto 15, sa House of Committee on Appropriations, apan gi-postpone kini sa Agosto 27 tungod sa hangyo sa OVP.
Samtang, karong tuiga, ang OVP walay gisugyot nga alokasyon alang sa confidential ug intelligence funds (CIFs) sa iyang budget.
Kahinumdoman nga ang gisugyot nga mga CIF ubos sa OVP budget para sa 2024 nahimong punto sa panaglalis kalabot sa paggasto sa OVP nga P125 milyones niadtong Disyembre 2023.
