Nagpagawas og pahimangno ang Office of Civil Defense (OCD) ug mga lokal nga kagamhanan sa publiko, ilabina sa mga residente sa Metro Manila ug mga kasikbit nga probinsya, nga mag-amping tungod sa dili maayong kalidad sa hangin nga dala sa baga nga haze o aso gikan sa mga sunog sa kalasangan sa Kalimantan, Indonesia.
Sumala kang OCD Deputy Administrator Assistant Secretary Raffy Alejandro, ang baga nga aso gikan sa mga wildfires sa Indonesia misulod sa nasod human kini madala sa hangin padulong sa rehiyon.
Tungod niini, pipila ka LGU ang nagpagawas usab og kaugalingong pahimangno sa ilang mga residente.
Gipahimangnoan ni Caloocan City Mayor Along Malapitan ang mga residente nga magsul-ob og facemask kung mogawas sa ilang mga panimalay aron malikayan ang posibleng epekto niini sa panglawas, human makarekord og dili maayong kalidad sa hangin sa ilang lungsod ug sa tibuok Metro Manila.
Base sa report, namatikdan ang baga nga haze nga nakapahinabo sa pagkalabo sa skyline sa Metro Manila, nga klarong nakita gikan sa Antipolo City, Rizal alas-5:48 sa buntag karong Martes, Septiyembre 1.
Gipatin-aw usab sa Department of Environment and Natural Resources–Environmental Management Bureau (DENR-EMB) nga padayon nilang gibantayan ang kalidad sa hangin sa mga apektadong lugar, ilabina sa National Capital Region (NCR), CALABARZON ug MIMAROPA.
Sa pagkakaron, padayon ang pagsusi sa mga awtoridad sa lebel sa polusyon ug gibag-on sa aso aron matino ug maandam ang posibleng epekto niini sa panglawas sa publiko ug sa kalikupan.
