GENERAL SANTOS CITY – Gi-kordon ang entrada sa City Hall sa Gensan ug dili una paagian sa mga empleyado tungod daghang nakitaan ug dagkong liki lakip ang canopy hinungdan nga temporaryo unang muagi ang mga empleyado sa exit nga bahin.
Atul usab sa flag raising ceremony, wala una gigamit ang covered court tungod gisiradhan usab kini gumikan sa mga cracks hinungdan nga natigayon ang flag raising atubangan sa City Hall.
Lakip ang one stop shop building ang wala gipagian ang entrance nga bahin inay sa exit sa susamang gihapong rason.
Gani, girekomenda usab alang sa demolisyon ang dakong semento nag water tank tapad sa CSWDO gumikan delikado nga matumpag ugaling nga mutay-ug na usab ang makusog nga linog.
Kahibaluan nga sa gipahigayong assessment sa City Engineers Office, nasuta ang cracks apan wala pay makita major damages sa mga gambalay ug tulunghaan.
