Ginahulat pa sa kapulisan ang resulta sa ballistic examination sa usa ka punto kwarentay singko nga pistola nga gigamit sa pagpusil kang Ian Fernandez, 27 anyos taga Calumpang, Gensan ug trabahante sa canning factory sa syudad.
Matud ni Police Major Ian Bagot, Chief of Police sa Fatima Police Station, itandi kini sa ubang resulta sa gihimong pagsusi sa mga narekober nga pusil sa kapulisan aron madetermina kung gigamit ba kini sa uban pang shooting incident nga natigayon sa dakbayan ug sa ubang lugar sa Region 12.
Gawas sa pusil, narekober usab ang tulo ka bala ug usa ka magazine. Sa karon balhog sa selda ang mga suspek nga pulos nanimuyo sa Olarte Labangal ug magparyentihanay lamang.
Kasong frustrated murder ang gipasaka sa kapulisan batok sa duha ka suspek.
Sa imbestigasyon, nagkabikil ang grupo sa biktima ug sa mga suspek sa imnanan. Sa dihang mipauli ang biktima, giatangan sa mga suspek ug gipusil.
