GENERAL SANTOS CITY – Galaum karon ang kapulisan sa San Isidro Police Station nga mailhan sa daling panahon og maaresto ang suspek sa kasong frustrated murder og rape sa usa ka front desk officer sa usa ka hotel ning dakbayan.
Kini human nga ilaha nang gipagawas ang facial composite sa suspek nga kabahin pagkalap og dugang impormasyon alang sa pagresolba sa kaso.
Anaa sa 5’5 o 5’6 ang gitas-on sa suspek, tama-tama ang kadak-on sa lawas, 20 hangtud 30 anyos ang pangidaron og itum ang kulay sa panit.
Kahinumduman nga natigayon ang insidente niadtong Easter Sunday kung asa nag-inusara lamang ang biktima sa ilang balay.
Tungod abli ang gate ug pultahan sa balay, misulod ang wala mailhing lalaki og dayon midiretso sa lawak sa biktima nga niadtong tungura natulog.
Nituktok ang suspek sa kwarto hinungdan nga giablihan sa biktima tungod nagtuo nga niabot na ang iyang amahan gikan nagsimba.
Niadtong tungura, na-alimungawan pa ang biktima og sa dihang nakit-an niya ang wala mailhing lalaki, didto na natigayon ang komosyon.
Apan nakakita ug kutsilyo ang suspek og gidunggab ang biktima sa dughan.
Hinuon, nagpapatay-patay matud pa ang biktima og dihang nakit-an sa suspek ang sitwasyon niini, paspas nga misibat sa lugar.
Sa pagkakaron, padayong nagpaalim ang biktima sa ospital og anaa na sa luwas nga kahimtang.
