Kasamtangang balhog karun sa buhatan sa Traffic Enforcement Unit ang driver nga giilang si alyas Romy 53 anyos, driver sa pick-up nga gipanag iya sa Philippine Coconut Authority nga residente sa Kadulasan Street, Barangay Dadiangas East ug ginahulat na lang ang mamahimong desisyon sa pamilya sa biktimang giila nga si Ariel Salarda, 44 anyos, minyo ug residente sa Asai Village, Brgy. Bula, ning dakbayan.
Kahinumduman nga natigayon ang aksidente sa miaging adlaw, Abril 8 ning tuiga sa Zone 6, Purok 19, Barangay Lagao. Ang kapulisan sa TEU ang gipahibalo pinaagi sa tawag sa usa ka concerned citizen nga dunay natigayon nga aksidente sa maong lugar alas 7:20 sa gabii.
Gilayon nga girespondihan kini sa mga awtoridad ug nag pahigayon ug inisyal nga imbestigasyon, pag abot sa lugar ilang nasuta ang usa ka unit Triton Pick up ug usa ka wala nay kinabuhi nga lalaki sa kalsada.
Nigawas sa imbestigasyon nga ang pick up ang naga byahe sa eight lanes road sa National Highway gikan Barangay Ligaya paingon sa Barangay Lagao gamit ang inner lane samtang ang biktima ang nitabok sa kalsada paingon saiyang vulcanizing shop ug didto na nabanggaan ang nahisgutan nga nagresulta saiyang hinanaling kamatayon.
