GENERAL SANTOS CITY – Gipangayo sa taga DPWH supervising Engineer sa Mabuhay under pass project nga magmugna ug Resolution ang Konseho ning syudad nga magpatuman ug truck ban aron dili maapektuhan ang pagkalot nga ginahimo.
Kini human gibutyag sa sesyon ni Engineer K. R. Bantayan nga nagbilin lamang ug “one lane” ang matag dalan samtang siradhan na nila ang Mabuhay junction lakip ang Bulaong junction.
Ang mga sakyanan nga gikan matud pa sa Mabuhay ang moliko pa-tuo ug pag-abut duol sa tulay anha pa magkurbada pabalik sa syudad.
Samtang mao usab ang mahitabo sa mga sakyanan gikan sa Bulaong avenue nga moliko sila sa Bayabas street ug mugawas sa National Highway kini tungod magsugod na ang pagkalot sa lugar.
Apan gisogyot hinuon ni Konsehal Richard Atendido kang Engr. Bantayan nga himuon nga duha ka “lanes” ang dalan pinaagi sa pag-relocate sa mga poste ug pagtapan sa dalan atubang mga establisemento aron mo-luag ang dalan ug dili makaangkon ug traffic jam.
Matud ni Atendido nga palisod sa mga motorista ang plano sa DPWH tungod tulo ka tuig nga himuon ang maong proyekto.
Gisogyot usab ni Vice Mayor Rosalita Nuñez kang Atendido nga magpasa ug resolosyon aron hingpit mapatuman sa syudad.
