GENERAL SANTOS CITY – Nagpasalamat ang DPWH region 12 sa mga nagpakabana nga residente nga mitaho kalabutan sa road project sa barangay Calpidong, Glan, Sarangani Province hinungdan nga nakahimo dayon ug aksyon ang ilang buhatan.
Matud ni Ellen Torino, Chief Public Affairs and Information staff sa DPWH 12 nga sulod sa 24 oras nahatagan dayon ug aksyon ang reklamo.
Dali matud pa nga nagpagawas ug kamandu-an si DPWH 12 Director Baser Ibrahim ug gipabakbak sa contructor ang gibuhos nga semento.
Gikumpirma ni Torino nga wala makasunod sa standard ang nahisgutang proyekto hinungdan nga giimbestigahan aron matudlo kung si kinsa ang nasayop dungan sa pag-angkon nga walay pouring permit nga naisyu ang ilang buhatan.
Matud niini nga adunay technical team nga nagmonitor sa proyekto apan wala muadto sa lugar tungod nameligro ang ilang kahimtang.
Kahinumduman nga giadtu-an mismo sa Bombo News team ang lugar ug nakuhaan ug pahayag ang project Engineer nga giingong naghatag ug go signal nga magbuhos ug semento bisan ug walay gihuptan nga pouring permit gikan sa DPWH.
Sa kasamtangan matud pa gipatawag ang constructor aron pasidan-an sa nahitabo nga kapalpakan.
