Nagpadayon ang pag-abot sa mga donasyon alang sa mga naapektuhan sa 7.8 magnitude nga linog sa General Santos City, diin mikabat na sa P205 milyon ang kinatibuk-ang kantidad nga nadawat sa lokal nga panggamhanan.
Sumala kang Mayor Lorelie Pacquiao, P150 milyon niini ang gikan sa national government ubos sa administrasyon ni Pangulong Ferdinand Marcos Jr.
Gikan sa maong donasyon, P100 milyon ang gitagana alang sa renovation ug pag-ayo sa mga gambalay nga nadaot tungod sa kusog nga paglinog, samtang P50 milyon ang gigamit sa pagpalit og bugas alang sa mga residente nga naapektuhan.
Gipasalamatan sa mayor ang tanang nagpaabot og tabang ug donasyon alang sa mga biktima sa linog, ilabi na samtang nagpadayon ang pagbangon sa syudad gikan sa epekto sa kalamidad.
Gihangyo usab ni Pacquiao ang mga apektadong residente nga magpabiling lig-on ug dili mawad-an og paglaum, tungod kay, matud niya, malagpasan ra gihapon ang mga hagit nga dala sa maong katalagman.
