Nabalaka ang Department of Justice (DOJ) sa kapin walo ka milyon nga giingong peke nga Person with Disability (PWD) IDs sa Pilipinas, kon itandi sa 2.8 milyon lamang nga rehistradong PWDs sa nasud.
Sumala sa departamento, gibase kini sa datos nga nadawat gikan sa National Council on Disability Affairs (NCDA).
Matod ni Chief State Counsel Dennis Arvin Chan, adunay dakong kalainan tali sa gidaghanon sa giingong peke nga PWD IDs ug sa aktuwal nga rehistrasyon sa mga Persons with Disability.
Gibanabana nga mokabat sa unom ka milyon ang maong kalainan, nga nakapabalaka sa DOJ.
Gipahinumdoman usab sa departamento ang mga tawo nga mogamit og napamatud-ang peke nga PWD ID nga mahimo silang manubag sa balaod ug kasuhan tungod sa falsification of public documents, estafa, ug graft and corruption, depende sa ilang kalambigitan sa kaso.
Gihangyo usab ang mga negosyante nga makig-coordinate sa ilang lokal nga pangagamhanan aron mapamatud-an ang pagkalehitimo sa mga PWD ID nga ilang gidudahan nga peke.
