Giproseso na sa Department of Migrant Workers (DMW) ang repatriation request sa 223 ka Overseas Filipino Workers (OFWs) sa Israel.
Matod ni DMW Secretary Hans Leo Cacdac, ila usab nga gihikay ang mga kinahanglanon sa pagbiyahe sa 30 ka mga Pinoy nga maoy unang batch nga makapauli.
Ang grupo sa 30 naglakip sa 26 ka FOW nga niabot sa Jordan human miagi sa Allenby Bridge ug King Hussein Bridge kagahapong adlawa .
Santang karong Martes, mamauli na ang 26 ka OFWs nga kuyogan sa tulo ka Pinoy gikan sa Jordan ug usa gikan sa West Bank.
Gipasalig ni Cacdac nga makadawat og igong tabang gikan sa gobyerno ang mga nanguli nga OFW.
Sa ilang pag-abot sa nasod, hatagan sila og P150,000 nga financial assistance, training voucher gikan sa Technical Education Skills Development Authority (TESDA), allowances, psychosocial counseling ug post-arrival medical check-ups.
Ang Israel ug Iran anaa karon sa Alert Level 3 tungod sa nagpadayon nga panagsangka.
Tungod niini, ilang gitambagan ang mga Pilipino sa Israel nga ikonsiderar ang pagpauli aron dili sila madala sa kagubot..
