Gipasidaan ni Atty. Andy Villa, propesor sa MSU-General Santos City, ang mga ginikanan ug komunidad sa posibleng epekto sa sobra ug dili maayong paggamit sa teknolohiya ug social media sa mga kabataan.
Matud ni Villa, nagkadaghan ang mga kabataan nga mas naggahin og oras sa digital platforms kaysa sa pakig-istorya ug pakig-uban sa mga tawo nga anaa sa ilahang palibot
Lakip sa iyang gitan-aw nga mga kabalaka ang cyberbullying, online bashing ug sobra nga social media use nga mahimong makaapekto sa emosyonal ug mental nga kahimtang sa mga batan-on.
Gihisgutan usab niya ang social comparison ug FOMO o fear of missing out, diin mahimong mobati ang mga kabataan og kabalaka o kakulang sa pagsalig sa kaugalingon tungod sa ilang makita sa social media.
Alang kang Villa, dili lamang pamilya ang kinahanglan molihok niini nga concern, kundili apil ang mga eskwelahan, PTA ug komunidad.
Matud niya, gikinahanglan ang “whole-of-society approach” aron magkahiusa ang lain-laing sektor sa paggiya ug pagpanalipod sa mga kabataan batok sa mga risgo sa online world
