Gikompirma sa kanhi warden sa Davao Prison and Penal Farm nga gitawagan siya ni kanhi President Rodrigo Roa Duterte ug gipahalipayan human gipatay sa duha ka piniriso ang tulo ka Chinese drug lords sulod sa prisohan.
Gihimo ni Supt. Gerardo Padilla ang iyahang affirmation sa supplemental affidavit nga iyang gihatag sa Quad Committee nga iyang gipirmahan niadtong Septiyembre 4, 2024.
Sa supplemental affidavit ni Padilla, gisuportahan niini ang pamahayag ni Leopoldo “Tata” Tan Jr. kinsa nagkanayon nga si kanhi President Rodrigo Duterte nanawag kang Padilla aron pahalipayan human nagmalampuson ang misyon sa pagpatay sa tulo ka Chinese drug lords nga si Chu Kin Tung alyas Tony Lim; Li Lan Yan, alyas Jackson Li; ug Wong Meng Pin, alyas Wang Ming Ping
Matod ni Padilla, samtang naglakaw sila ni Tan ug Magdadaro nga giposasan paingon sa investigation section, gitawagan siya ni kanhi Presidente Duterte.
Dugang pa niini nga iya dayong giingnan ang iyang mga kauban nga nanawag ang Presidente ug gipahalipayan siya.
Gitataw ni Padilla nga nabalaka siya sa iyang seguridad ug sa iyang pamilya sa Davao City tungod kay napugos siya sa pagsulti sa iyang counter-affidavit nga pinetsahan Agosto 27, 2024 nga wala siya makadawat og bisan unsang tawag gikan ni kanhi Presidente Duterte.
Sa iyang ikaduhang supplemental affidavit nga gipirmahan niadtong Septiyembre 9, iyang gipamatud-an ang pamahayag ni kanhi polis Jimmy Fortaleza kalabot sa mga sirkumstansya nga naglibot sa pagpatay sa tulo ka drug lords.
Giangkon usab ni Padilla nga nag-estorya sila ni Royina Garma sa telepono ug giingnan siya nga dili manghilabot.
Nakigsulti usab kaniya si Col. Leonardo ug giingnan siya nga ilang patyon ang tulo ka Insek.
