Andam ang Department of Agriculture (DA) sa pagtubag kung ang epekto sa nagkagrabeng tensyon tali sa Iran ug Israel mabati sa sektor sa agrikultura.
Matod ni Agriculture Secretary Francisco Tiu Laurel Jr., hugot nga gibantayan sa departamento ang posibleng epekto sa krisis, partikular na sa abono nga gi-import gikan sa Gulp region.
Gipasalig usab sa kalihim nga adunay andam nga pondo ang DA alang sa subsidy sa gasolina sa mga mag-uuma ug mananagat kung ugaling mograbe ang tensyon.
Matod niya ang DA padayon nga nakig-alayon sa Department of Energy kalabot sa maong isyu, aron matubag ang bisan unsang problema tungod sa pagsaka sa presyo sa lana.
Gipaabot usab sa kalihim ang lihok sa presyo sa pipila ka mga produkto sa merkado, tungod sa epekto sa pagsaka sa presyo sa lana, butang nga padayon nga tutukan sa departamento aron mapanalipdan ang mga konsumidor.
