GENSAN- Gipalig-on ni Gensan City Mayor Lorelie Geronimo Pacquiao ang pagsunod sa “enhanced curfew ordinance” alang sa mga menor de edad nga gimando sa Department of the Interior and Local Government.
Sumala sa mayor, dugay na kining ginapatuman sa Gensan ug dili na kini bag-o sa ilang pamalakad, ilabi na sa lebel sa barangay.
Gibutyag sa mayor nga bisan pa kaniadto nga siya usa pa ka Barangay Kapitan, ginabuhat na nila ang maong lakang aron maprotektahan ang kabatan-onan.
Gihangyo usab niya ang mga Barangay Kapitan nga padayon ug seryosohon ang implementasyon sa direktiba ug dili kini balewalain.
Gisiguro sa mayor nga responsable ug epektibo ang mga barangay officials sa pagpatuman sa curfew.
Ang maong ordinansa nagtinguha sa pagpanalipod sa kaluwasan ug disiplina sa mga kabatan-onan sa dakbayan.
