GENSAN- Nagpaklaro si Atty. Rey Cartojano kalabot sa gikatakdang confirmation of charges hearing batok kang kanhi Presidente Rodrigo Duterte sa International Criminal Court karong adlawa.
Matud niya, ang maong hearing dili pa aktuwal nga husay, kondili usa ka proseso diin susihon sa mga huwes sa ICC kung adunay igo nga ebidensya aron ipadayon ang kaso. Gipasabot niya nga lahi kini sa sistema sa korte sa Pilipinas, diin ang piskalya una magdeterminar sa probable cause sa reklamo ug ang korte maoy magpagawas og warrant of arrest kon adunay basehan.
Sa ICC, una nga gipagawas ang warrant of arrest bisan wala pa ang formal nga pagdetermina sa igo nga basehan sa reklamo.
Ang confirmation hearing mao ang proseso nga magbuot kon ipadayon ba ang kaso ngadto sa pormal nga husay o dili.
Gisiguro ni Cartojano nga ang publiko makasabot sa kalainan sa proseso sa ICC ug sa lokal nga judicial system aron malikayan ang kalibog ug sayop nga pagsabot sa mga legal nga lakang.
