GENERAL SANTOS CITY – Nagpadayon ang ginahimong monitoring sa City Health Office Gensan sa mga hospital sa syudad aron sutaon kung duna ba silay mga natalang kaso sa mga sakit nga mugna sa tumang kainit sa panahon tungod na usab sa nasinatiang El Niño.
Segun ni Dr. Carl Igrobay, sa City Health Office Gensan nga usa sa ilang ginamonitor mao ang kaso sa heat exhaustion ug heat stroke ingon man mga sakit nga sagad nasinatian panahon sa tag-init sama sa chicken pox ug tipdas.
Tumong niini aron nga makahimo gilayon ug aksyon ang buhatan sa City Health para mapugngan ang pagsaka sa kaso sa maong mga balatian kung duna man.
Dugang pagbutyag ni Dr. Igrobay nga gawas sa ilang ginahimong monitoring sa mga hospital, ila na usab gimanduan ang tanang mga health Centers nga mangandam pinaagi sa paghatag ug early consultation o first aid higayon nga dunay dad-on nga mga pasyente sa ilang mga health Centers.
Dugang pa ni Dr. Igrobay nga dili lang ang kaso sa heat exhaustion ug heat stroke ang dapat bantayan kon dili mag-amping uasb batok Food Poisoning tungod paspas lang mapan-os ang mga pagkaon tungod sa kainit sa panahon.
Panawagan nalang ni Dr. Igrobay ngadto sa katawhan nga mag-inum kanunay ug tubig. Dapat 8 hangtud na sa 10 ka basong tubig ang imnom aron nga hydrated kanunay.
Samtang alang usab sa mga nagatrabaho ilawom sa init sa adlaw sama sa mga Drivers, mga construction workers, mga mag-uuma ug uban pa dapat mag sul-ob ug luag nga senina ug dapat light color lang.
Likayan ang pagsul-ob ug itom nga senina tungod naga-absorb kini ug init ug mas dali nga maka- deydrate sa usa ka tawo.
