Gihimakak ni Commission on Elections (COMELEC) chairperson George Garcia ang mga akusasyon batok kaniya, ilabi na sa iyang giingong offshore accounts.
Sa press conference, gipakita ni Garcia ang mga papeles ug mga pruweba nga wala gyud siyay account gawas sa nasud.
Gipakita usab niini ang address sa tawo nga giingong nagpadala sa kwarta sa giingong offshore account.
Nasuta nga ang address niini susama ra usab sa kanhi supplier o election provider sa COMELEC nga Smartmatic.
Bisan og wala direktang gitumbok ni Garcia ang Smartmatic nga maoy nagpaluyo sa mga pasangil, daghang personalidad nga may kalambigitan sa kompanya ang makita.
Gitataw usab ni Garcia nga langyaw nga entidad ang nanghilabot sa piniliay sa nasod.
Sa pagkakaron ang moral sa poll body giingong nagpabiling taas.
Iya usab nga gisubli nga ang maong mga isyu dili makaapekto sa ilang pagpangandam alang sa piniliay.
