Wala gyud mapugngi ang paglambo sa BINI human padayon nilang gipakita ang ilang kusog sa entablado pinaagi sa ilang “Signals World Tour.”
Human sa ilang sold-out nga concert sa Manila, sunod na nilang adtoon ang Cebu alang sa ilang unang concert didto nga ipahigayon karong Hulyo 11, Sabado.
Apan dili pa kutob didto ang kalipay sa ilang mga fans, tungod kay sa Agosto mogawas na usab sa nasod ang BINI aron ipasigarbo ang musikang Pinoy sa ilang 11-stop North American leg sa tour.
Sugdan nila ang ilang mga pasundayag sa Honolulu, Hawaii sa Agosto 1, dayon mosunod ang Los Angeles sa Agosto 5, Rohnert Park sa California sa Agosto 7, Las Vegas sa Agosto 8, ug San Diego sa Agosto 9.
Adto usab sila sa Canada alang sa mga show sa Vancouver sa Agosto 18, Calgary sa Agosto 21, Edmonton sa Agosto 22, Winnipeg sa Agosto 24, ug Toronto sa Agosto 27. Mobalik sila sa Estados Unidos alang sa ilang pasundayag sa Brooklyn, New York sa Agosto 28.
Nanguna usab sa trending topics sa X ang ilang Manila leg sa “Signals” nga gihimo sulod sa duha ka gabii sa MOA Arena niadtong Hunyo 20 ug 21.
Gipasundayag sa BINI ang ilang bag-ong mga kanta sama sa “Step Back” ug “Sugar Rush,” apil ang mga paboritong kanta sa ilang fans nga Bloom sama sa “I Feel Good,” “Lagi,” “Na Na Na,” ug “Unang Kilig.”
