GENSAN- Subay sa hugot nga kampanya batok sa illegal nga smuggling sa nasud, malampusong nasakmit sa Police Regional Office-12 (PRO-12), ubos sa pagpangulo ni Regional Director PBGEN Arnold Ardiente, ang bilyon-bilyon nga balor sa mga kontrabando sa nagkalain-laing operasyon sa rehiyon.
Lakip sa mga operasyon mao ang pagkasikop sa pipila ka mga personahe, lakip na ang usa ka aktibong pulis, nga nakuhaan og mga walay dokumento nga sigarilyo sa Sultan Kudarat.
Gipasiugda ni Gen. Ardiente nga ang smuggling usa ka matang sa “economic sabotage” tungod kay dako kini og epekto sa kita sa gobyerno ug sa panginabuhian sa mga lokal nga mag-uuma ug negosyante.
Sa pagkakaron, ang mga nasakmit nga kontrabando anaa na sa kustodiya sa Bureau of Customs (BOC) alang sa saktong disposisyon, samtang nag-atubang na og kasong pagsupak sa Customs Modernization and Tariff Act ang mga dinakpan.
Nagpabilin ang PRO-12 sa ilang mantra nga “Service Beyond Our Badge” aron maseguro ang kalinaw ug kahapsay sa SOCCSKSARGEN.
