GENERAL SANTOS CITY – Nakig-alayun si Incoming Brgy. Captain Rock Garay sa Brgy. South ngadto sa Philippine Coast Guard, CENRO ug uban pang ahensiya sa gobyerno aron mahatagan gilayon ug pagtagad ang nisangyad nga barko sa baybayon sa may bahin sa Queen Tuna park ning syudad.
Sa pakighinabi sa Bombo kang Kap. Garay, gibutyag niini nga kagahapon sa udto pa nila namatikdan ang maong barko nga nasangyad og wala na makapahawa pa human nga naabtan og low tide.
Gani, napadangat na sa Coast Guard ang kabahin niini kung asa gisulayan pa nila ug bira apan wala makaya. Sumala pa sa opsiyal, gisusi na usab sa taga CENRO kung aduna bay kadaut sa maong bahin sa baybayon ilabina nga adunay gipananom nga mga artificial coral reefs.
Nagduda si Capt. Garay nga coal o semento o basin mga sinako nga bugas gikan sa Vietnam ang karga sa maong barko.
Kini gumikan ang maong barko ang usa ka cargo vessel nga gikan sa maong nahisgutang nasud.
Sa pagsusi sa Bombo radyo, nasuta nga nakamarka atubang sa barko ang HTK Energy nga gikan sa Hai Phong, Vietnam.
