Nasikop sa joint buy-bust operation sa mga operatiba sa Philippine Drug Enforcement Agency (PDEA) Region 7 ug PNP Regional Intelligence Unit 7 ang anak sa usa ka barangay kapitan sa Dakbayan sa Sugbo, nga giilang usa ka target-listed drug personality, sa Benedicto Street, Barangay Tejero, Cebu City, niadtong Setyembre 3, 2025.
Giila ni PDEA-7 Regional Director Joel B. Plaza ang suspek nga si alias “Jun”, 42 anyos, usa ka drayber sa barangay hall ug residente sa Barangay Carreta, Cebu City.
Nasikop si Jun pasado alas 2:30 sa hapon human sa usa ka buwan nga case buildup nga gihimo batok kaniya.
Matud sa mga otoridad, giingong makabaligya kini og hapit usa ka kilo nga shabu matag semana.
Sa maong operasyon, nakumpiska ang lima (5) ka pakete sa giingong shabu nga adunay gibug-aton nga 250 gramos ug gibanabanang market value nga ₱1.7 milyon, kauban ang buy-bust money ug uban pang non-drug evidence.
Gisumite na sa PDEA-7 Laboratory ang mga drug evidence alang sa chemical analysis ug legal nga disposisyon.
Matud sa mga otoridad, nga bisan gamay pa ang kantidad sa ilegal nga druga, ang silot niini mao ang tibuok kinabuhi nga pagkabilanggo ug multa nga moabot sa ₱500,000 hangtod ₱10 milyon.
Matud ni Director Plaza, kaniadtong 2022, nalambigit na sa droga si Jun apan nakaikyas sa operasyon ug giilang at large hangtod nasikop pag-usab karon.
Nagpadayon pa ang imbestigasyon ug gipaabot nga mas daghan pa ang posibleng madakpan base sa mga impormasyon nga nakuha sa operasyon.
