Gidugangan sa Department of Budget and Management (DBM) og P2,000 ang honoraria sa mga magtutudlo ug support staff nga moserbisyo sa eleksyon karong Lunes, Mayo 12, 2025.
Matod ni Budget Secretary Amenah Pangandaman, kini subay sa direktiba ni Presidente Ferdinand Marcos Jr. nga patas-an ang bayad sa mga magtutudlo ug uban pa nga motabang sa lokal ug nasudnong piniliay karong Lunes.
Matod niya, nasayod ang Presidente sa kalisod, kakapoy, ug sakripisyo sa mga magtutudlo sa pagbantay sa mga boto, hinungdan nga iyang gimando nga usbawan ang ilang mga benepisyo.
Tungod sa dugang nga honoraria, ang mga musunod makadawat na ug dakong bayad:
-P12,000 para sa chairperson gikan sa kanhi P10,000;
-P11,000 alang sa mga poll clerk gikan sa nadawat kaniadto nga P9,000;
-P11,000 para sa ika-3 nga miyembro, mas taas sa miaging P9,000; ug
-P8,000 para sa support staff gikan sa kanhing rate nga P6,000.
Nanawagan si Pangandaman sa Commission on Elections (Comelec) nga siguruhon nga ma-release sa tukmang oras ang taas nga bayad sa mga magtutudlo ug poll workers nga moserbisyo karong Lunes, Mayo 12.
Ang budget alang sa kompensasyon sa mga mamumuo sa botohan anaa sa 2025 General Appropriations Act, nga mokabat sa P7.480 bilyon.
Base sa banabana sa Comelec, moabot sa 758,548 ka mga poll workers ang moserbisyo karong umaabot nga piniliay ug ang bayad nga ilang madawat, gawas sa honoraria, naglakip sa ilang travel allowance, communication allowance, meal allowance, ug service credit.
