GENERAL SANTOS CITY – Nakaangkon og suporta gikan sa Catholic faith group ang mga magbabalaod nga nagduso sa hingpit nga pagpatuman sa Absolute Divorce Bill nga napasa sa Kamara sa niaging semana.
Sa interview sa Bombo Radyo kang Obispo Joseph Lagumbay sa Catholic Universalist Church of Asia, gipahibalo niini nga dili angay hatagan ug daotang kahulugan ang maong sugyot balaodnon tungod naghatag kini ug proteksyon sa kababaehan nga nag-atubang sa abusong-pisikal.
Dugang pa ni Lagumbay nga dili siya kontra sa disborsyo bisan ug maayo man ang panag-uban nila sa iyang pamilya.
Apan gusto lang matud pa niini nga isalba ang sugyot nga balaod aron dili maabuso ang mga inahan ug kababaehan nga gimaltrato sa ilang mga kapikas ug mga biktima usab sa pagluib.
Kahinumduman nga sa paghisgot sa maong balaudnon sa Kamara, adunay 126 ang pabor samtang 109 ang misupak ug 20 ang nag-abstain.
