-- ADVERTISEMENT --

Gipagawas sa mga lider sa 21 ka miyembrong ekonomiya sa Asia-Pacific Economic Cooperation (APEC) ang 2026 APEC Leaders’ Declaration human sa pagtapos sa 33rd APEC Economic Leaders’ Meeting sa Shenzhen, China, nga gipangulohan ni Chinese President Xi Jinping.

Sa pahayag nga gipagawas kagahapon, Nobyembre 21, nagkahiusa ang mga lider sa pagtinabangay aron mapadayon ang kalig-on sa ekonomiya, mapalambo ang produktibidad ug mapalig-on ang pagtubo sa ekonomiya alang sa kaayohan sa tanang katawhan.

Padayon usab nilang tinguhaon ang market-driven economic integration sa rehiyon sa Asia-Pacific, lakip ang pagpadayon sa mga lakang ubos sa Free Trade Area of the Asia-Pacific (FTAAP) agenda.

Gipunting sa maong deklarasyon ang upat ka nag-unang larangan sa panaghiusa ug kooperasyon sa mga miyembrong ekonomiya, nga naglakip sa pamatigayon ug pamuhunan, konektibidad, inobasyon ug pagtubo sa ekonomiya.

Gikatakda usab nga magtigom pag-usab ang mga lider sa APEC sa 2027 sa Phu Quoc, diin ang Viet Nam maoy mahimong sunod nga tigpangulo ug host sa umaabot nga APEC Economic Leaders’ Meeting.

-- ADVERTISEMENT --