Nagkainitan ang House impeachment prosecutor nga si Rep. Terry Ridon ug defense counsel Sheila Sison atol sa impeachment trial batok kang Vice President Sara Duterte human magbangga ang ilang mga pahayag bahin sa giingong pag-usik sa oras sa korte.
Nagsugod ang panaglalis sa dihang gipatin-aw ni Sison ang rason nganong dili makatambong ang mga testigo sa depensa sa mga naka-iskedyul nga hearing sa sunod semana. Matod ni Sison, nagmatngon ang kampo sa depensa sa paggamit sa oras sa impeachment court, wala mag-abuso sa korte ug wala mag-usik og tulo ka bulan sa pagpresentar sa mga testigo nga ilang bawion ra usab sa ulahi.
Dihadiha, mihangyo si Ridon nga tangtangon sa opisyal nga rekord sa korte ang maong pahayag pinaagi sa mosyon nga “move to strike,” apan mipadayag si Sison nga kamatuoran lamang ang iyang gisulti.
Isip tubag, gipasiugda ni Ridon nga wala mausik ang oras sa korte ug kinahanglan klarohon ang maong isyu atubangan sa impeachment court. Ang pahayag ni Sison may kalabotan sa lakang sa prosekusyon niadtong Oktubre 2026 nga bawion ang tulo sa upat ka impeachment articles nga naghisgot sa confidential funds, bribery ug grave threats, aron magpokus na lamang ang pagtaral sa alegasyon sa unexplained wealth o dili maipatin-aw nga bahandi.











