Gideklarar sa International Court of Justice (ICJ) nga sad-an ang Myanmar sa genocide—ang sistematikong pagpuo—batok sa mga Rohingya, usa ka grupong minorya nga Muslim, may kalabotan sa dinagkong mga operasyon militar niadtong 2017.
Pinaagi sa botasyon nga 9–6, ang kinatas-ang korte sa United Nations mihukom nga gilapas sa Myanmar ang Genocide Convention, base sa mga ebidensya sa dinagkong pagpamatay, sekswal nga kapintasan, ug uban pang mga kabangis nga gihimo batok sa mga Rohingya.
Matod ni ICJ President Yuji Iwasawa, dili momenos sa 10,000 ka mga Rohingya ang gipatay sa mga pwersa sa seguridad sa Myanmar, samtang kapin sa 730,000 ang napugos sa pagkalagiw ngadto sa Bangladesh tungod sa maong kapintasan.
Kini ang unang higayon nga gipapanubag sa ICJ ang usa ka estado sa krimen nga genocide. Gimandoan usab sa korte ang Myanmar nga mohatag og reparasyon o bayad-damay ngadto sa mga biktima.
Samtang, ang nasod sa The Gambia—nga maoy nagsang-at sa kaso batok sa Myanmar—naghulagway sa maong hukom isip usa ka makasaysayanong lakang padulong sa pagkab-ot sa hustisya sulod sa internasyonal nga komunidad.











