GENSAN- Patay ang usa ka 5-anyos nga batang babaye human malumos sa swimming pool sa usa ka beach resort sa Barangay Bawing, General Santos City, kagahapon, Nobyembre 15.
Base sa inisyal nga imbestigasyon sa kapulisan, nakit-an ang bata nga nalubog sa swimming pool nga gitagana alang sa mga bata sa Watergran Beach Resort sa Purok Ilang-Ilang, alas 12:06 sa udto.
Dali siyang gihatagan og first aid ug gihimoan og resuscitation sa wala pa gidala sa Gensan Medical Center sa Barangay Calumpang, diin miabot siya alas 12:40 sa udto.
Apan, bisan pa sa medikal nga pagtabang, gideklara siyang patay alas 1:10 sa hapon.
Giingong acute respiratory distress syndrome ang hinungdan sa iyang pagkamatay, nga ikaduhang epekto sa acute respiratory failure tungod sa pagkalumos.
Ang inahan sa bata nga giila lamang sa alyas nga Yanna, 22 anyos, maoy nagbantay kaniya sa maong higayon.
Samtang, padayon pa ang kapulisan sa pagkuha og dugang detalye kalabot sa insidente.
