Gihimo nang tradisyon ni Giovanie Nodalo ang pagdonar og dugo tungod sa kalipay nga iyang mabati sa matag higayon nga makatabang sa mga pasyenteng nanginahanglan niini.
Isip usa sa mga malampusong blood donor sa Dugong Bombo 2026, gipaambit niya nga gusto niyang mapadayon ang pagdonar matag tulo hangtod unom ka bulan o matag tuig, basta kwalipikado ug makapasar sa medical screening.
Gidasig usab niya ang publiko nga ampingan ang panglawas aron mahimong kwalipikado sa pagdonar og dugo.
Matod niya, ang maong kalihokan dili lamang simpleng paghatag og donasyon kondili usa ka makahuluganon nga paagi sa pagtabang sa isigkatawo.
Pinaagi niini, mahimo silang makahatag og paglaum ug kahigayonan nga maluwas ang kinabuhi sa mga pasyenteng nagkinahanglan og dugo.
