POLOMOLOK- Nadakpan sa kapulisan ang tulo ka lalaki human masakmit gikan kanila ang 380 ka ream sa mga sigarilyong giingong smuggled sa gipahigayong random checkpoint sa Purok Riverside Extension, Barangay Silway 7, Polomolok, South Cotabato, alas 10:20 sa buntag, Nobyembre 15, 2026.
Giila ang mga nadakpan nga sila Iman Saripadan y Enca, 29 anyos, Arham Aslan y Sangbaan, 26 anyos, ug Sanny Ismael y Amerol, 26 anyos, nga puro residente sa Montay, Malabang, Lanao del Sur.
Base sa report sa Polomolok Municipal Police Station, narekober gikan sa mga suspek ang 380 ka ream sa New Berlin nga sigarilyo nga walay tax stamp ug graphic health warning label.
Nakasakay ang mga kontrabando sa puting Suzuki multicab dropside nga adunay plaka nga KAS 6719.
Gibanabana nga mokabat sa P325,158.40 ang kantidad sa mga nasakmit nga sigarilyo.
Ang operasyon gipahigayon sa hiniusang pwersa sa RID 12 Special Tracker Team Bravo and Charlie ug Polomolok Municipal Police Station.
Gidala sa estasyon sa kapulisan ang tulo ka nadakpan, mga sigarilyo ug ang gigamit nga multicab alang sa hustong disposisyon.
Samtang, giandam na sa kapulisan ang kaso batok sa mga suspek tungod sa paglapas sa Republic Act 10643 o Graphic Health Warnings Law.
