Nakurat ug wala makatuo ang P-pop group nga SB19 human sila maapil sa listahan sa mga artist nga mopasundayag sa sikat nga Coachella Festival 2027.
Mopasundayag ang grupo sa Abril 9 hangtod 11 ug Abril 16 hangtod 18, 2027.
Matud sa usa ka miyembro sa grupo nga si Stell, kaniadto damgo lamang nila nga makaapil sa maong music festival.
Gipasiguro niini nga malingaw ang ilang mga fans tungod kay dili lamang sila motambong sa maong kalihokan kondili mangandam usab sila alang sa ilang performance.
Matud usab ni Pablo, dugay na nilang pangandoy nga makaapil sa maong music festival, busa dako kini nga kalampusan ug katumanan sa ilang mga pangandoy.
Samtang, miingon sila Justin ug Ken nga sugdan na dayon nila ang pagpangandam alang sa ilang performance.
Gipahayag usab sa miyembro sa grupo nga si Josh nga mahimo kining inspirasyon sa kasamtangan ug umaabot nga henerasyon sa mga Filipino artist.
Kahinumdoman nga gipahibalo na sa organizers sa Coachella ang ilang lineup nga pangunahan sa beteranang singer nga si Madonna, Dua Lipa, SZA ug daghan pang uban.
