Nakatakdang mobiyahe paingon sa Malaysia ang Gilas Pilipinas sa Nobyembre 21 alang sa fifth window sa FIBA World Cup Asian Qualifiers.
Gidalian ang ilang pagbiyahe aron mahatagan og hangtod lima ka adlaw si coach Tim Cone ug ang national team nga maanad sa palibot sa Seremban City ingon man sa dulaanan sa Karisma Arena.
Gilauman usab nga magpahigayon si Cone og mini-camp sa Malaysia aron mapalig-on ang baroganan sa Gilas ug masiguro ang ilang pagkwalipikar sa World Cup nga ipahigayon sa Doha, Qatar sa sunod tuig.
Sa Nobyembre 22, mosunod sa Malaysia ang pipila ka overseas players sama nila Dwight Ramos, AJ Edu ug Kevin Quiambao, samtang posible usab nga makaduwa si Kai Sotto.
Gilauman usab ang pag-abot ug pagdula sa bag-ong naturalized player sa nasud nga si Bennie Boatwright.
Sa pagkakaron, adunay upat ka daog ug upat ka pildi ang Gilas Pilipinas ug anaa sa ikalima nga puwesto sa Group E. Nanguna sa grupo ang Australia, gisundan sa New Zealand, Iran ug Jordan.
Sigurado nang nakasulod sa World Cup ang Australia, samtang ang duha pa ka sunod nga pinakamaayong koponan sa grupo awtomatikong makaabante usab.
Una nga atubangon sa Gilas ang Syria sa Nobyembre 27, nga sundan sa ilang ikaduhang panag-atubangay batok sa Iran sa Nobyembre 29.
