Gipahinumdoman sa Department of Labor and Employment o DOLE ang tanang pribadong kompanya nga sundon ang gitakdang deadline sa paghatag sa 13th-month pay ngadto sa ilang mga empleyado.
Ang maong benepisyo mandatoryong ihatag sa tanang rank-and-file employees sa pribadong sektor, bisan unsa pa ang ilang employment status ug pamaagi sa pagbayad sa suweldo, basta nakatrabaho sila og labing menos usa ka bulan sulod sa kalendaryong tuig.
Giklaro kini pinaagi sa Labor Advisory No. 21, Series of 2026 nga gipirmahan ni Labor Secretary Francis N. Tolentino, subay sa Labor Code ug Presidential Decree No. 851.
Lakip usab sa makadawat sa maong benepisyo ang mga trabahante nga gibayran base sa ilang nahimong trabaho o output, mga empleyadong nagtrabaho sa labaw sa usa ka employer, ingon man kadtong ni-resign o gitangtang sa trabaho sa wala pa matapos ang tuig. Apil usab ang mga empleyadong nakagamit og maternity leave ug nakadawat og salary differential.
Gipasabot sa DOLE nga ang minimum nga 13th-month pay katumbas sa one-twelfth o 1/12 sa kinatibuk-ang basic salary nga nadawat sa empleyado sulod sa tibuok tuig.
Pananglitan, kon mokabat sa 120 mil pesos ang kinatibuk-ang basic salary sa usa ka trabahante sulod sa tuig, aduna kini’y katungod nga makadawat og 10 mil pesos nga 13th-month pay.
Samtang, ang mga empleyadong mo-resign o matangtang sa trabaho sa wala pa matapos ang tuig, adunay gihapon katungod nga makadawat sa katumbas nga bahin sa ilang 13th-month pay base sa ilang aktuwal nga basic salary nga naangkon.
Gipahinumdoman sa ahensya ang mga employer nga tumanon ang maong obligasyon ug siguruhong madawat sa mga kwalipikadong trabahante ang ilang benepisyo sulod sa gitakdang panahon.
